الطفل المشاكس
كثير ناس عندن منو بالبيت. هذا الطفل يلي ما بيهدا لحظة..يلي بخرب كل شي بيمسكو..يلي ما بنام كل النهار وبظل بكل طاقتو..يلي عنيد كثير وما بيسمع الكلمة..
يلي قليلة اللحظات يلي بتلاقيه على الارض فيها..
وبمضيها متعلق على المجلى أو الطاولة أو حتى ممكن تشوفو على التلفزيون أو سطح الخزانة..
هذا الطفل.. صحيح هوي متعب كثير للأهل ومابيكفي يلحقوه شخص ولا ثنين..
بس لازم تعرفو كم شغلة عنو..
هذا الطفل ذكي كثير ومن علامات الذكاء هيي زيادة النشاط هي يلي عم تزعجكن..
(هذا لايعني أبداً إنو الطفل الهادئ أقل ذكاء) ..
هذا الطفل عندو استقلالية بشخصيتو وعبيبني ثقة عالي بنفسو.. فلا تقمعوه وتكسرولو ياها.. هوي بدي توجيه فقط لهذا العناد..ورح تشوفو قديش رح يكون بشخصية حلوة بعدين..
هذا الطفل .. هيك عالمو.. هوي صح عم يخرب ويضوجكن.. بس هوي عم يصنع جزء من ذاتو.. ذاكرتو.. حياتو..
هوي هيك عم يكبر بهي التفاصيل يلي عم تعملو فرح وفهم وتفريغ مشاعر ونضج..
الشي يلي سخيف بالنسبة إلك ، ومتعب ، ومالو داعي ، وتخريب و...
هوي شي كثير كبير للطفل .. عالم مليان تفاصيل .. عالم مليان ذكريات.. هوي هذا الطفل بعد سنين.. متل مإنت مزيج من كل ذكرياتك وتجاربك الماضية..
بتقلي بس اني ماكنت هيك!
ليش مين قلك انو هوي لازم يكون متلك؟
طيب والحل؟
الحلول كثيرة.. مش هدفي احكي فيها هون.. وفي شغلات مالها حل كمان.. غير الصبر والتقبل..
و مش معنى كلامي نسكت عن تخريب الطفل ومانربيه صح ونعلمو.. هذا موضوع اخر..
بس بكرا بيكبروا..
بتخلص هي المرحلة.. وبتشوفوهن قدامكن شباب وصبايا..
والكن الخيار كيف تخلوا شخصيتن وذكريات طفولتن..
تظلوا بخير?
د.عصام الحجلي
